Со транспаренти на кои стои „Крвави ви се рацете“, „Гробиштата се полни од бугарското пријателство“, „Фашисти пресоблечени во администратори“ жителите на битолското село Кравари ќе ја пречекаат бугарската делегација предводена од премиерот Кирил Петков.
Петков денеска во Битола ќе отвори клуб кој ќе работи во состав на културниот центар „Иван Михаилов“. Тој ќе биде придружуван од потпретседателката на Бугарија Илијана Јотова, министерката за надворешни работи Теодора Генчовска и поранешната шефица на дипломатијата Екатерина Захариева, кои, како што соопштуваат оттаму „ќе промовираат владини проекти на таа држава на кои ќе им претходи средба на Петков премиер со бугарски здруженија на граѓани во земјава“.
Предвидено е во новоотворениот клуб да има библиотека од над 2.000 учебници, историски книги и дел архивски материјали, што предизвика доста реакции на социјалните мрежи, каде се повикува на протести во Битола.
Јавен протест за отворањето на клубот изразија од Сојузот на борците од Народноослободителната и Антифашистичката војна на Македонија 1941-1945 и граѓаните продолжувачи, а протест најави и политичката партија Левица, поради „отворањето на клуб под името на еден од промоторите на фашизмот, империјализмот и антимакедонските политики“.
