Стапува во сила Законот за нефер трговски практики, се очекува намалување на цените на околу 2.500 производи

Стапи во сила Законот за нефер трговски практики во синџирот на снабдување на земјоделски и прехранбени производи кој дополнително треба да ги намали цените на производите и треба трајно да стави ред во трговијата.

Со него се опфатени близу 2,500 производи на кои профитната маржа им е ограничена до 10 отсто, поради што се очекува за 10 отсто да ги намали нивните цени.

Со Законот, покрај ограничен рабат, трговците нема да смеат да наплаќаат дополнителни трошоци за маркетинг, репрезентација, како и за истакнување одреден производ на полица.

Министерот за економија и труд Бесар Дурмиши нагласува дека овој закон не ја регулира трговската маржа, туку ги забранува дополнителните трошоци (надоместоци) кои добавувачите морале да ги плаќаат за нивните производи да се продаваат од купувачите.

– Со примена на овој закон очекуваме резултати на долг рок и намалување на цените на овие производи на листата од најмногу 10%, односно првите резултати со намалени цени ги очекуваме до крајот на октомври кога очекуваме дека ќе се потрошат залихите од претходните договори и ќе почнат да се продаваат производите согласно новите договори.

Законот е донесен на 20 март 2024 година и трговците и добавувачите имаа рок од шест месеци да ги усогласат договорите, односно да склучат нови договори, не подоцна од 27 септември.

Тоа значи дека од денеска почнува и ефективната примена на овој Закон, вели Дурмиши.

Надлежен орган за контролира на примената на Законот е Комисијата за заштита на конкуренцијата, која ја контролира примената на одредбите од овој закон и поведува прекршочна постапка доколку се прекрши било која мандаторна одредба од Законот.

Прекршочна постапка се поведува по службена должност или по барање на физичко или правно лице кое има легитимен интерес за утврдување на постоење прекршок и мора да заврши во рок од три месеци.

Решенијата за сторен прекршок се објавуваат на веб страницата на Комисијата за заштита на конкуренцијата.

Во зависност од тежината и значењето на прекршувањето Законот предвидува казни за најтежок прекршок и полесни прекршоци.

Највисокиот износ на казна за најтежок прекршок може да изнесува до 20,000 евра за голем трговец и од 350 до 500 евра за одговорното лице во правното лице кој е голем трговец.

Казните за полесни прекршоци зависат од тоа дали прекршокот го сторил правно или физичко лице.

Највисокиот износ на казната за полесен прекршок што може да се изрече во постапка е 5,000 до 6,000 евра за голем трговец и 350 до 500 евра за одговорното лице во правното лице кој е голем трговец.

Решенијата на Комисијата за заштита на конкуренцијата се конечни. Против нив може да се поднесе тужба за поведување на управен спор пред надлежен суд.

Тужбата за поведување на управен спор се поднесува во рок од 30 дена од денот на приемот на решението и не го одлага извршувањето на решението.

Министерот Дурмиши, сепак, посочува дека во наредните три месеци, доколку се утврди дека при склучување на новите договори не се испочитувани одредбите на Законот, ќе има опомени, односно нема да се преоѓа веднаш на казнување.

До крајот на 2024 година, ќе се соработува со компаниите за да утврди дали се правилно склучени договорите односно дали се опфатени соодветно одредбите од законот.

Во меѓувреме, продoлжува да се применува и владината одлука за ограничување на маржата на 10% во трговија на големо и трговија на мало на 73 основни прехранбени производи, со цел се заштитат граѓаните од ценовни шокови додека да почнат да се чуствуваат првите резултати од Законот за нефер трговски практики.