„Агентите што беа откриени како руски шпиони во бугарската Државна агенција работеле против добрососедските односи на Бугарија со С. Македонија и со Западниот Балкан“.
Ова го изјави бугарскиот премиер Кирил Петков во интервју за софиски „24 Часа“.
„Тука треба сите да се замислиме зошто руската држава инвестирала средства преку нејзината шпионска мрежа за таа цел“ – вели Петков.
Според него, сите треба да се запрашаат дали долгорочен бугарски интерес е С. Македонија да стане дел од ЕУ или да „остане една исклучена земја“.
„Според мене тоа се важни прашања за кои треба да се замислиме, уште повеќе кога има тенденција дека некој работи против тоа. Дали навистина бугарски интерес е С. Македонија да се оддалечува од членство во ЕУ или пак тоа е руски интерес, кој не сака да го види целиот Балкан стабилен и дел од Европа“ рече Петков.
Тој нагласи дека е очигледно оти има руско мешање во Бугарија поврзано со Западниот Балкан и С. Македонија.
„Во овој скандал станува збор за руски интереси. Луѓето кои беа вмешани работеа во многу специфичен правец, а тоа е Западниот Балкан да нема европска иднина и нашите односи – односите меѓу Република С. Македонија и Бугарија, да не бидат толку пријателски, какви што би сакале да бидат како меѓу едни добри соседи“ – вели Петков.