Полските власти уапсија 18 лица под сомнение дека планирале непријателски активности и саботажа во име на Русија и Белорусија, вклучително и убиството на украинскиот претседател Володимир Зеленски, соопшти денеска министерот за внатрешни работи Томаш Сиемонак.
Полските власти поврзаа некои неодамнешни подметнати пожари или обиди за подметнување пожари со агенти спонзорирани од Русија. Меѓу уапсените во последните месеци има државјани на Полска, Белорусија и Украина, се наведува во соопштението на Агенцијата за внатрешна безбедност.
Сиемониак рече дека актите на саботажа очигледно биле дел од поширок план кој вклучувал сајбер напади, притискање на мигранти да преминат од Белорусија во Полска и загрозување на нејзината безбедност бидејќи ја поддржува Украина во одбраната од руската инвазија.
Полјак беше уапсен во април под обвинение дека бил подготвен да шпионира за руското воено разузнавање и да учествува во наводен заговор за убиство на Зеленски, соопштија полските обвинители.
Тој, наводно, побарал контакт со Руси директно вклучени во војната во Украина и се очекувало да пренесе детални информации за стратешкиот аеродром Жешов-Јасионка во југоисточна Полска, во близина на границата со Украина.