Германија мора брзо да ги депортира мигрантите кои немаат право на престој, но и да продолжи да ги прифаќа оние кои имаат право на азил и оние со потребните вештини, изјави во вчерашното интервју германскиот канцелар Олаф Шолц.
– Мораме да ги депортираме во голем обем оние кои немаат право да останат во Германија – изјави Шолц за Der Spiegel.
Тој нагласи дека оние кои немаат услови за азил и немаат изгледи да останат мора да си заминат.
– Мора да депортираме повеќе и побрзо – изјави германскиот канцелар.
Шолц рече дека е неопходен цел пакет мерки за ограничување на илегалната миграција, што вклучува подобра заштита на надворешните граници на Европската Унија и построга контрола на границите на Германија со соседните членки на ЕУ.
Канцеларот додаде дека Германија мора да продолжи да прифаќа бегалци кои имаат право на азил поради политички прогон или други легитимни причини, како и да привлекува повеќе мигранти со потребните вештини.
„Но, оние што не припаѓаат на ниту една група не можат да останат со нас“, повтори Шолц.
Интервјуто беше објавено додека владејачката коалиција, составена од Социјалдемократската партија (СПД), Зелените и Слободната демократска партија (ФДП), дебатираше за миграциската политика.
Некои политичари на СПД не беа воодушевени од изјавата на Шолц за депортациите. Пратениците Раша Наср и Хакан Демир вчера објавија дека депортациите се „само мал дел од решението“ во време на висока инфлација и повици од компаниите за помош.
„Миграцијата е едно од многуте прашања со кои треба да се справиме – некои се однесуваат како да е единственото прашање што остана, а има толку многу што треба да направиме“, рекоа претставниците на Бундестагот.