Шекеринска за ФЕНА: НАТО е буден – Русија создава поделби во регионот

НАТО внимателно ги следи обидите на Русија да влијае врз внатрешните процеси во Босна и Херцеговина и поширокиот регион на Западен Балкан, изјави заменик-генералниот секретар на Алијансата, Радмила Шекеринска, за ФЕНА. Таа истакна дека ваквите активности претставуваат типичен „руски модел на дејствување“ и се дел од нивниот хибриден арсенал.

„Многу внимателно ги следиме обидите на Русија да се меша во домашните и регионалните процеси. Видовме како хибридните активности создаваат поделби, користат дел од сецесионистичката реторика и поттикнуваат дополнителни расцепи во општествата и регионот. Ние го следиме тоа,“ предупреди Шекеринска.

Таа додаде дека овој модел на дејствување не е ограничен само на Западен Балкан, туку се забележува и кај други сојузници и партнери на НАТО.

Шекеринска нагласи дека Алијансата останува посветена на Западен Балкан како регион од стратешко значење и дека има бројни сојузници и партнери во регионот, вклучително и БиХ.

Во врска со одбранбениот сектор на БиХ и модернизацијата на Оружените сили (ОСБиХ), таа истакна дека НАТО настојува да обезбеди поддршка во практични области, но дека клучно е ОСБиХ да добијат одржливи и посилни финансиски средства.

„Не можете да очекувате да имате добро обучени, опремени и подготвени вооружени сили, понекогаш во најтешки услови, ако не вложувате во нив,“ нагласи Шекеринска, потсетувајќи на своето искуство како поранешна министерка за одбрана.

Таа спомена и програмата DCB (Пакет за зајакнување на одбраната), преку која НАТО обезбеди опрема и специјализирани возила за ОСБиХ, со поддршка од Словенија. „Сепак, тоа мора да биде проследено со зголемено и одржливо финансирање на Вооружените сили,“ додаде таа.

На прашањето за порака до политичките лидери во БиХ, Шекеринска истакна дека политичките компромиси се секогаш болни и ризични за кариерите, но дека од нејзиното искуство тие секогаш се исплатуваат.

„Компромисите носат поголема сигурност, предвидливост и им овозможуваат на граѓаните да знаат дека следната година нема да се соочуваат со истите проблеми,“ рече таа, додавајќи дека граѓаните очекуваат од политичарите вистински исчекори, а не повторување на старите проблеми од изминатите три децении.