Централните банки ги намалија каматните стапки, пораснаа вредностите на главните берзански индекси

Минатата недела во центарот на вниманието беа состаноците на централните банки, најавите за индексот на менаџери за набавка и некои други важни макроекономски податоци. Во Индија се одржаа парламентарни избори, а цената на нафтата ја заврши неделата малку пониско.

Главните вести од изминатата недела ги вклучуваат состаноците на Kанадската централна банка (BoC) и на Европската централна банка (ECB), кои како што се очекуваше, ја намалија основната каматна стапка за 25 базични поени. Така, според новата каматна стапка на ЕЦБ депозитната стапка ќе изнесува 3,75%. Банката одлучи да ја намали каматната стапка и покрај малку повисоката стапка на инфлација од целната. За ЕЦБ ова беше прво намалување на каматните стапки од 2019 година, а според податоците на Блумберг, аналитичарите во моментов очекуваат уште две намалувања на каматните стапки во еврозоната до крајот на оваа година. Во понеделникот беа објавени и податоци за вредноста на индексот на менаџерите за набавка (PMI) за еврозоната. Вредноста на индексот во мај изнесуваше 47,3 и е сè уште под границата од 50 што го дели растот од контракцијата, но по неколку месеци, трендот на намалување на вредностите запре и индексот е на највисоко ниво од март 2023 година. Намалувањето на обемот ги намали и новите нарачки, извозот и набавните активности. Вредноста на композитниот PMI индекс, кој ги вклучува активностите во производствениот и во услужниот сектор, во мај се искачи на вредност од 52,2 во еврозоната (во април изнесуваше 51,7).

Некои други макроекономски податоци од Бирото за статистика на трудот во САД беа објавени во петокот, кои покажуваат мешана слика за состојбата на економијата. Од една страна, невработеноста во мај порасна за 0,1 процентен поен на 4%, а од друга страна, бројот на отворени нови работни места изнесува 272.000, додека според податоците на Блумберг, прогнозите предвидува 180.000. Растот на просечната часовна заработка, која се смета за важен показател на инфлаторните притисоци, изнесува 0,4% на месечно ниво и 4,1% на годишна основа. Во среда ќе бидат објавени податоците за инфлацијата во САД во мај, при што сегашниот консензус на аналитичарите за вкупната инфлација е 3,4%, а инфлацијата без цените на храната и енергијата се очекува да биде 3,5% на годишна основа.

Во Индија се одржаа парламентарни избори каде актуелниот премиер Narendra Modi доби трет последователен мандат. Сепак, неговата победа не беше толку убедлива како што првично очекуваа инвеститорите, бидејќи тоа беше првпат на неговата партија да и треба помош од регионалните партии за да формира влада. Индиската берза загуби значително веднаш по објавувањето на изборните резултати и во вторникот ја забележа најголемата дневна загуба од 2020 година, но до крајот на неделата практично ја надополни загубата. Индиските капитални индекси инаку забележаа солидни приноси оваа година благодарение на силниот економски раст, поттикнат од владините реформи кои одговараат на инвеститорите на индискиот пазар. Тоа е наведено како причина поради која Индија доживува побрз економски раст од нејзините пазарни ривали во подем, а американската агенција за кредитен рејтинг S&P Global неодамна го направи првиот чекор кон многу очекуваното подобрување на кредитниот рејтинг на земјата со подобрена перспектива, која ќе го направи поатрактивен за светските инвеститори и ќе ги намали трошоците за задолжување на земјата.

Цената на нафтата продолжи да се намалува на почетокот од неделата, а потоа успеа да врати одредена вредност, благодарение на уверувањата од картелот ОПЕК + во врска со нивната најнова одлука за понудата. Имено, земјите-членки на картелот се договориле да одржуваат намалени количества на екстракција на нафта извесно време за да спречат натамошен пад на цените. Групата споменати земји веќе произведува речиси 6 милиони барели нафта дневно помалку отколку што може – со стратешка цел да се намали глобалната дневна понуда на нафта за околу 6%. Цената на нафтата од Западен Тексас ја затвори неделата на 69,9 американски долари за барел, или 1,5% пониска во однос на претходната недела, мерена во евра.