Херцог: Трамп заслужува Нобелова награда за мир
Израелскиот претседател Исак Херцог ја пофали улогата на американскиот претседател Доналд Трамп во посредувањето за договорот меѓу Израел и палестинската милитантна група Хамас за ставање крај на војната во Газа, изјавувајќи дека Трамп заслужува Нобелова награда за мир за своите напори.
Израелскиот претседател Исак Херцог ја пофали улогата на американскиот претседател Доналд Трамп во посредувањето за договорот меѓу Израел и палестинската милитантна група Хамас за ставање крај на војната во Газа, изјавувајќи дека Трамп заслужува Нобелова награда за мир за своите напори.
– Нема сомнеж дека тој ја заслужува Нобеловата награда за мир за ова, напиша Херцог на X.
– Овој договор ќе донесе моменти на неописливо олеснување за драгите семејства кои не спијат веќе 733 дена. Овој договор нуди шанса за обнова, за закрепнување и за отворање на нов хоризонт на надеж за нашиот регион. Ова е време да им оддадеме чест на хероите меѓу нас – на нашите синови и ќерки што храбро се бореа за да ги вратат заложниците дома; на ужалените семејства; на повредените – телесно и духовно; и на сите што платија неподнослива цена за овој историски и судбински момент, нагласи Херцог.
Трамп претходно соопшти дека Израел и милитантната палестинска организација Хамас се договориле за првата фаза од мировниот план за Газа.
– Ова значи дека сите заложници ќе бидат ослободени многу скоро, а Израел ќе ги повлече своите трупи до договорената линија како прв чекор кон силен, траен и вечен мир, напиша Трамп на својата платформа Трут Сошл.