Платата на претседателката на Европската централна банка (ЕЦБ), Кристин Лагард, е повеќе од 50 проценти повисока од онаа што ја објави ЕЦБ, што ја прави најплатен функционер во Европската унија, објавува „Фајненшл тајмс“.
Весникот наведува дека „целосната плата на претседателката на ЕЦБ, Кристин Лагард, е повеќе од 50 проценти повисока од нејзината објавена плата“, и дека износот „ја прави најплатен функционер во ЕУ само врз основа на нејзината основна плата“.
Според пресметките на „Фајненшл тајмс“, шефицата на ЕЦБ заработила приближно 726.000 евра во 2024 година, што е за околу 56 проценти повеќе од нејзината основна плата од 466.000 евра, што ЕЦБ го наведе во својот годишен извештај.
Ова значи дека Лагард заработува речиси четири пати повеќе од претседателот на Федералните резерви на САД, Џеј Пауел, чија плата е утврдена со американскиот федерален закон и моментално е ограничена на 203.000 долари (172.720 евра).
Само основната плата на Лагард ја прави најплатен службеник на ЕУ, додека годишната основна плата на претседателката на Европската комисија, Урсула фон дер Лајен, е за 21% пониска.
Според анализата на „Фајненшл тајмс“, покрај основната плата, Лагард добива дополнителни бенефиции од околу 135.000 евра за домување и други прашања.