Вечерва ќе биде познат освојувачот на трофејот во Лигата на шампионите за сезоната 2023/24. Во финалето на митскиот „Вембли“ во Лондон ќе се соочат пријатното изненадување Борусија Дортмунд и фаворитот Реал Мадрид, а почетокот на пресметката е во 21 часот.
Борусија Дортмунд има еден трофеј и тоа од сезоната 1996/97 по победата од 3:1 над Јувентус во финалето. „Жолто-црните“ имаат уште една пресметка за трофејот, во сезоната 2012/13, но тогаш на „Вембли“ загубија од големиот ривал Баерн Минхен со 1:2.
Дортмунд имаше лоша среќа да се најде во „групата на смртта“, но сепак излезе од неа со освоени 11 поени, оставајќи ги зад себе Пари Сен Жермен (0:2, 1:1), Милан (0:0, 3: 1) и Њукасл (1:0, 2:0). Во осминафиналето избраниците на Един Терзиќ го елиминираа ПСВ Ајндховен (1:1, 2:0), во четвртфиналето го победија Атлетико Мадрид (1:2, 4:2), а во полуфиналето повторно се сретнаа со ПСЖ (1:0, 1:0) и на крајот го совлада францускиот шампион.
Интересно, брилијантниот настап на Борусија во Европа е во контраст со оној во Бундеслигата, каде што тимот заврши само петти во конечниот пласман со 63 бода по 18 победи, 9 нерешени и 7 порази.
Вечерашното финале е уште поспецијално за БВБ бидејќи тоа ќе биде последен натпревар за легендата на клубот, Марко Ројс, кој ќе направи се што е во негова моќ да си замине со највредниот трофеј на клубот.
Од друга страна, Реал Мадрид победи во дури 14 од своите 17 финалиња низ историјата на турнирот. Така денеска „кралскиот клуб“ ќе го брка својот 15. трофеј во натпреварувањето и доколку го освои ќе го подобри сопствениот рекорд по титули во ЛШ. Како и обично, четата на Карло Анчелоти имаше силен настап на својот омилен турнир. Беше беспрекорен во групната фаза каде заврши со вкупно 18 бодови по вкупно 6 победи против Наполи (3:2, 4:2), Брага (2:1, 3:0) и Унион Берлин (1:0, 3:2). Во елиминациите мадриѓаните уште еднаш ја покажаа својата озлогласена непопустливост, последователно исфрлајќи ги РБ Лајпциг (1:0, 1:1), Манчестер Сити (3:3, 1:1 и 4:3 на пенали) и Баерн (2:2, 2:1) ) од турнирот.
Што се однесува до настапот на Реал во Ла Лига, таму тимот ја освои титулата на неприкосновен начин со импресивни 95 бода со оглед на нивните 29 победи, 8 нерешени и 1 пораз. Интересното е што „лос бланкос“ за првпат ќе играат финале на турнирот „Вембли“. Од друга страна, финалето ќе биде осмо за Анчелоти како тренер во ЛШ. Италијанскиот стручњак може да стане единствениот менаџер со пет трофеи во натпреварувањето, откако има два со Милан и уште два со Мадрид. Згора на тоа, дури четворица негови играчи – Начо Фернандез, Лука Модриќ, Даниел Карвахал и Тони Крос можат да и парираат на легендата на клубот, Франциско Генто како рекордери со 6 трофеи во Лигата на шампионите како фудбалери.
За германскиот играч за врска ова ќе биде последен меч на клупско ниво во кариерата.
Од 2012 година, двата тима играа меѓу себе импресивни 10 пати во Лигата на шампионите. Реал Мадрид има блага предност на овие натпревари со 4 победи, 3 нерешени и 3 порази. Четири од тие натпревари беа во елиминациска фаза, Германците триумфираа во четвртфиналето во 2013 година, но само една година подоцна „Лос Меренгес“ им се реваншираа и ги елиминираа во четвртфиналето. Нивните последни средби беа во 2017 година, кога Шпанците ги добија двата меча.
Веројатни почетни состави:
Борусија (Дортмунд): Кобел, Риерсон, Хумелс, Шлотербек, Маатсен, Кан, Забицер, Адејеми, Брант, Санчо, Фулкруг.
Реал Мадрид: Куртоа, Карвахал, Начо, Рудигер, Менди, Валверде, Камавинга, Крос, Белингем, Родриго, Винисиус.