Филипче: Слушајќи го алармот на граѓаните предлагам концепт за нов општествен и политички дијалог
-Слушајќи го овој аларм и барање на граѓаните, слушајќи го и алармот што го покренуваат и компаниите и бизнисите, потребно е да се направи еден систем, една нова форма на политички дијалог, би рекол и општествен дијалог во којшто ќе се вклучат сите политички патии и други чинители во општеството. Да се изготват стратешки документи, ќе се направи стратегија а врз основа на која државата ќе функционира во следните повеќе од една деценија, деценија и пол или две децении. Многу повеќе од мандатот на која било влада и било која партија или коалиција да ја води таа влада бидејќи очигледно е дека во одредени области мораме да знаеме на каде одиме, истакна Филипче.
Лидерот на СДСМ, Венко Филипче, ги образложи денес на прес конференција темите кои според него треба да бидат на маса на евентуална лидерската средба, па и повеќе од тоа – за општествен договор. Мотивот за лидерската, како што рече Филипче, е алармот на граѓаните дека е потребен политички и општествен дијалог за да се изготват стратешки документи како да функционира државата надвор од мандатот на една влада предводена од една било која политичка коалиција.
„Реакцијата на граѓаните е сосема оправдана, транзицијата и реформите не дадоа резултати, јавните сервиси не ги исполнија очекуваните на граѓаните“, рече Филипче.
Тој ги наведе областите на кои би се посветило вниманието на лидерската средба, на која, како што рече тој, предлогот е да се направи заеднички прифатлива агенда на која ќе се посветат сите политички партии застапени во парламентот, со широка поддршка на јавноста. Како прво тој го посочи образованието кое според него е област која бара ефикасни системски решенија, затоа што, како што рече, државата нема веќе деца што треба да ги губи во странство.
Здравството е следниот приоритет на кој треба да се повети лидерската, затоа што, рече Филипче, не може само да посакуваме да бидеме здрави туку тоа мора да стане реалност и да го тргнеме од дневно-политичките пресметки, надмудрувања и математики.
Во правосудството, посочи Филипче, да се донесат во што пократок период реформите со широк консензус, а не само политички, односно со вклучување на фактори со сериозни капацитети во правосудната екпертиза.
Заслужуваме да живееме во чиста животна средина, да дишеме чист воздух, а за огромните природни богатства мораме да најдеме начин да ги заштитиме, рече Филипче околу следната тема што ја предлага за лидерската средба, пред да ја посочи последната – партизацијата како проблем што најмногу ги иритира граѓаните.
„Да ги ослободиме институциите и системот од канџите на политика и партиите за младите луѓе да имаат компетитивен мерит систем и да веруваат во него, да се вработуваат и напредуваат со експертизата што поседуваат“, рече Филипче, на прес конференцијата на која ги образложи причините кои го поттикнаа да се организира лидерска средба за овие прашања.
Иако од ВМРО-ДПМНЕ оценија дека со барањето лидерска средба Филипче сака да си даде политичка тежина како лидер, премиерот Христијан Миоцкоски сепак не затвори врата за неговата понуда. Филипче денес најави дека и формално ќе побара средба со Мицкоски за да му ја пренесе лично иницијативата и темите за кои сака да се постигне заеднички консензус и заеднички да се изгради стратегија, а како прво да се договорат методите како да се одвива овој дијалог што според него не се случил досега во Македонија, во смисла дека партиите се вклучени во постојана конфронтација и не соработуваат ни околу основните национални прашања.
„Веќе е крајно време не само да зборуваме туку нешто и да направиме“, рече Филипче посочувајќи ја трагедијата во Кочани како настан кој ги покажа сите неуспеси на системот што го градевме досега.
„Ќе побарам средба со премиерот, а тој прв подаде рака и рече дека средбата е прифатлива. Првата средба може да биде тет-а-тет“, порача тој на прес конференцијата.
Тој тврдеше дека од настанот во Кочани и да сака СДСМ не може политички да профитира и дека од оваа криза сите треба да извлечеме поука и таа поука да ја имплементираме.