Филипче: Младите здравствени работници се оставени сами на себе, а здравствениот систем е без контрола

Ова власт секој ден покажува и докажува дека работи само за големите компании, за големите приватни болници, додека здравствениот систем тоне во хаос, а за граѓаните ништо не се прави, изјави од Струмица, претседателот на СДСМ, д-р Венко Филипче.

„Се отвора прашањето за кого крои политики министерот за здравство, за доброто на јавното здравство, на болниците, клиниките, здравствените установи или за доброто на приватните болници под влијание на неговите најблиски советници. Но тоа не не изненадува“, рече Филипче.

Во изјавата за медиуми, Филипче посочи дека во секоја област од здравството има проблем кој директно го чувствуваат на свој грб граѓаните.

„Голем проблем во изминатиот период, се закажувањата на термините за различни снимања, хируршки интервенцији на пациентите. За жал, морам да кажам дека во здравствениот систем има огромни проблеми и огромни пропусти“, рече Филипче.

Тој додаде дека младите здравствени работници се оставени сами на себе, а здравствениот систем е без контрола.

„Се соочуваме со една ситуација во која што млади лекари и специјализанти се оставени сами на себе, без никаква поддршка, без никаква супервизија, и кога тие се впуштаат сами без контрола во работата, а здравствениот систем и министерството не прават ништо да го воспостават тој систем на контрола, се случуваат големи грешки“, рече Филипче.

Како што кажа Филипче, Владата на ВМРО ДПМНЕ не направи ништо за подобрување на статусот на здравствените работници, за разлика од времето кога Владата на СДСМ вложуваше и во здравствената инфраструктура и во покачување на платите.

„ Жалам што после оние политики во седумте години на владеењето на СДСМ кога направивме се, да ги зголимиме платите, примањата кај лекарите, медицинските сестри, оние коишто деноноќно работат за доброто на пациентите и успеавме да ги дуплираме, некаде да ги зголемиме и два и пол пати, сега овие година и пол власт на ВМРО-ДПМНЕ здравствените работници немаат никакви зголемувања. Тоа е еден доказ дека оваа власт не се грижи за доброто на работниците, ниту пак за државата. Жалам што во Министерството за Здравство, во главниот советнички тим на министерот, има лекари од приватните болници“, изјави претседателот на СДСМ, Венко Филипче.