Филипче: Дали на мигрантите ќе им бидат дадени македонски пасоши и ќе бидат гласачка машинерија на ВМРО-ДПМНЕ?

Претседателот на СДСМ, Венко Филипче денеска порача дека како партија уште пред неколку месеци, предупредувале од опасноста со мигрантите и опасноста, според него, доаѓа од Владата и нивните тајни преговори и договори.

-Кога првпат ги спомнавме овие тајни преговори, а тоа беше потврдено преку пишувања во странски медиуми, веднаш скокнаа против патриотите од ВМРО-ДПМНЕ. Велеа дека лажеме и смислуваа кампања против мене и функционери од партијата. Во последните неколку дена излегоа информации со детали за што е разговарано по прашањето со мигрантите од Британија. И според овие пишувања во британските медиуми, дознаваме дека според разговори, мигрантите треба да бидат интегрирани и присутни на нашиот пазар на трудот, особено во градежништвото и тука да имаат трајни живеалишта. Има детални информации дека Велика Британија ќе ѝ исплаќа на Македонија 20 илјади фунти по депортиран мигрант, согласно новиот Договор за повратни центри. Сето ова македонските граѓани го дознаваат од странски медиуми. Ова е недозволиво и скандал од невидени размери, рече Филипче на денешната прес-конференција.

Лидерот на СДСМ прашува „како ние ќе се справиме со мигрантите, кога и развиените земји тешко се справуваат со проблемот“. Филипче тврди дека ЕУ ја менува политиката и ги заострува мерките за мигрантите – полесно отфрлање на барањата за азил, забрзана процедура за депортирање и заедничка листа на безбедни земји на потекло.

-Дали ќе гледаме центри за мигранти насекаде низ државата, во сите општини и градови? Дали ќе дозволиме „патриотите“ од ВМРО-ДПМНЕ да ја претворат Македонија во мека за мигранти? Дали може да очекуваме дека на мигрантите ќе им бидат дадени македонски пасоши и ќе бидат гласачка машинерија на ВМРО-ДПМНЕ? Сепак се ближат избори. Треба да кажеме одлучно не. Време е да се крене гласот на народот. Ги повикувам граѓаните да не поддржат и да ни помогнат да го спречиме ова антинационално движење, побара Филипче.