Филипче: Влезот во ЕУ значи обединување на сите Македонци

Претседателот на СДСМ, Венко Филипче, од младинска трибина во Струмица испрати порака за обединување и враќање на европска иднина на државата, потенцирајќи ги придобивките за целиот народ, но, пред се за младите:

„Бенефитот од влезот во Европа е многустран. Тоа е признание за нашиот идентитет, тоа е економски напредок, тоа е фер судство, тоа се повисоки плати, подобри услови за живот. Но најважно – тоа е начин за обединување на сите Македонци. Во и надвор од земјата.“

Филипче нагласи дека евроинтеграцијата не е апстрактен политички проект, туку битка за нормален живот:

„Кога млад човек ќе види дека државата му нуди фер систем, тогаш ќе остане овде. Ако не сториме ништо, ќе изгубиме уште илјадници талентирани млади луѓе. Тоа не смее да се дозволи.“

Социјалдемократите се посветени на тој пат, како наследници на АСНОМ и Илинден, со силна европска визија:

„Вие сте наследници на илинденците и асномците. Тоа е свето наследство. Наша обврска е да ја продолжиме нивната борба – денес преку знаење, учество, идеи. И да ја однесеме Македонија таму каде што припаѓа – во европското семејство на народите.“

Филипче исто така посочи дека Владата предводена од ВМРО-ДПМНЕ е влада која што ја одзема иднината и можноста за прогрес.Во обраќањето пред присутните, Филипче преупреди за една година ВМРО ДПМНЕ ја има урнисано секоја област во општеството.

„Христијан Мицкоски и ВМРО-ДПМНЕ ја урнисаа економијата, направија цените да растат без контрола, да не можат луѓето една кошничка да си наполнат, платите немаат абер да растат во следниот период, во земјоделството се намалија субвенциите – и за откупот на оризот, и за сточарите, и за лозарите, го урнисаа здравството, нè задолжија со седум милијарди евра – пари коишто ќе ги враќаат младите генерации“, рече Филипче.

Затоа, како што кажа Филипче, оваа хаотична состојба предизвикана од лошите политики на ВМРО-ДПМНЕ мора да престане, а државата мора да се врати на вистинскиот европски пат.

„Затоа, сега упатувам јасна порака: да си ја земеме државата назад. Да ја вратиме на вистинскиот европски пат. Многумина прашуваат што е бенефитот? Бенефитот е тоа што тоа ќе биде признание за нашиот идентитет. Затоа што тоа ќе биде начин на којшто поквалитетно ќе се живее. И затоа што влезот во Европа е конечно обединување на сите Македонци“, порача претседателот на СДСМ, Венко Филипче.