Фикрет Абдиќ осуден на 3,5 години затвор за злоупотреба на положбата началник на општина Велика Кладуша

Окружниот суд во Бихаќ го прогласи осудениот за воени злосторства Фикрет Абдиќ за виновен за злоупотреба на положбата и овластувањата додека беше градоначалник на општина Велика Кладуша и го осуди на три и пол години затвор, објавија денеска локалните медиуми во Босна и Херцеговина.

Во неправосилната пресуда е наведено дека во периодот од 2017 до 2020 година, кога ја извршувал функцијата градоначалник, Абдиќ незаконски давал парична помош на одредени лица, со што нанел значителна штета на општинскиот буџет.

Покрај казната од три и пол години затвор, судот на Абдиќ и наложил да и надомести на општина Велика Кладуша финансиска штета во износ од нешто помалку од 250 илјади евра, пишува порталот „Дневни аваза“.

Абдиќ беше уапсен во 2020 година додека беше на функцијата градоначалник, а потоа помина три месеци во истражен затвор.

Тој беше избран за градоначалник на Велика Кладуша во 2016 година и се врати во БиХ откако отслужи две третини од 15-годишната затворска казна во Хрватска на која беше осуден во 2005 година поради одговорност за воени злосторства во самопрогласениот автономен регион на Западна Босна, чиј челник беше тој.