„Чекаме да биде закажан состанок на Генералниот кризен штаб, и ако тој се одржи, на утрешната седница на Владата очекуваме да бидат изгласани препораките на Комисијата за заразни болести, меѓу кои е и таа за ослободување од носењето маски на учениците од основните училишта“. Ова денеска го изјави министерот за здравство – Беким Сали.
„Имаше точки кои ние ги донесовме како Комисија, но не избрзавме со гласање или преминување како одлука на Влада, затоа што состојбата во идната недела наложуваше дека можеби би можеле да се вратиме на претходната состојба. За да не излеземе несериозни, а одлуката на Влада е правосилна и треба да се имплементира во секојдневното функционирање на сите институции некогаш не избрзуваме со тоа што чекаме и следната недела како ќе постапиме, а потоа две одлуки ги поминуваме на Кризниот штаб“ – рече Сали.
Тој посочи дека посакува да се ослободиме од маските, меѓутоа, како што додаде, реалната состојба не го вели тоа.
„Секој ден има од 250 до 300 новоинфицирани што значи се уште не сме на нивото што го посакуваме. Новоинфицираните ни се показател дека се уште вирусот кружи низ населението. Според податоците ние сме во зелена зона, но не сме се уште за симнување на маските“ – додаде Сали.