Утре во Кочани со почеток во 16:05 часот во Паркот на Револуцијата, во организација на здружението „16 март“, формирано од дел од родителите на загинатите ќе се одржи „40-ти Марш на ангелите“.
Четириесетти пат, како што наведуваат, ќе чекорат заедно „со болка, со љубов и со непоколеблива решеност нашите ангели никогаш да не бидат заборавени“.
„Една година бараме вистина. Една година бараме одговорност. Една година чекаме вистинска правда. И нема да застанеме“, стои во објавата.
Од здружението порачуваат дека ќе продолжат да маршираат сè додека не се добие, како што велат, правдата што ја заслужуваат нивните деца.
„Ќе чекориме сè додека не ја добиеме правдата што нашите деца ја заслужуваат. Ќе чекориме сè додека вистината не излезе целосно на виделина“, наведуваат родителите.
На маршот ќе се говори и за, како што посочуваат, молкот на институциите по трагедијата, за одговорноста што сè уште се чека, како и за прашањата кои останале без одговор.
„Ќе зборуваме за тишината што премногу долго трае и за вистинската причина за смртта на нашите најмили, за која семејствата сè уште очекуваат целосна и јасна вистина“, се наведува во повикот.