УНИЦЕФ: Од почетокот на прекинот на огнот во Газа убиени се 67 деца

Најмалку 67 малолетници се убиени во Појасот Газа откако стапи на сила најновото примирје меѓу Израел и Хамас на 10 октомври, соопшти денеска  Детскиот фонд на ОН (УНИЦЕФ), пренесе ДПА.

Десетици други деца се повредени, изјави портпаролот на УНИЦЕФ, Рикардо Пирес, во Женева, повикувајќи се на партнерските организации на терен.

„Нема безбедно место за нив“, рече портпаролот. Иако медицинската состојба во Газа се подобрува, вкупно 4.000 сериозно повредени девојчиња и момчиња сè уште чекаат да бидат евакуирани за лекување надвор од Појасот, пренесе ДПА.

Израел и Хамас се согласија на прекин на огнот во октомври, но тој оттогаш постојано се прекршува од двете страни.

Мартин Пенер од Светската програма за храна (WFP) изјави дека жителите на Газа се многу загрижени поради почетокот на зимата, додавајќи дека падот на температурите и обилните дождови во последните денови ги истакнаа предизвиците што претстојат.

Пенер рече дека населението сега е подобро снабдено со храна благодарение на испораките на помош, а локалните пекари и кујни можат да им обезбедат на луѓето оброци. Пазарите се исто така повторно добро снабдени, додаде тој.

Меѓутоа, многу стоки се недостапни за повеќето луѓе, на пример, пилешко чини 25 долари, рече Пенер.