Убиецот на ракометарот Денис Тот се бара со меѓународна потерница

Македонското МВР објави меѓународна потерница по лицето Анџело Ѓорѓиевски, роден на 13 јануари 1994 година во Скопје, каде и живее на улица „9“ бр. 5, во село Волково.

Тој се бара по Наредба  КО. бр. 1211/22 од 12.04.2022 год. на ОЈО Скопје, поради основано сомневање за сторено кривично дело „Убиство“ по чл. 123 од КЗ на РСМ.

Ѓорѓиевски, кој е во бегство, е првоосомничен за убиството на ракометарот на РК „Бутел“, Денис Тот, додека на другите двајца осомничени, кои се товарат дека со нанесување на повреди на телото на Тот извршиле кривично дело „убиство“, им е изречена мерка притвор во траење од 30 дена.

Настанот се случи минатиот четврток во раните утрински часови, пред ноќен клуб во Скопје кога осомничените по кратка вербална расправија, го нападнаа сега починатиот хрватски ракометар и му зададоа повеќе удари со боксови и клоци. Од ударите тој падна и со задниот дел од главата удри во асфалт и изгуби свест. Тројцата осомничени продолжија со удирање по главата, а потоа без да му укажат помош заминаа од местото на настанот.

Лице вработено во ноќниот клуб повикало Итна медицинска помош по што ракометарот бил пренесен на Ургентниот центар при Клиничкиот центар „Мајка Тереза“ и според информациите од лекарите што го примиле, имал престанок на работата на срцето, масивен оток на мозокот, пресечен јазик и висока телесна температура.

По приемот бил ставен на апарати за дишење и бил во животно загрозувачка состојба, а наредниот ден и покрај обидите за реанимација починал.