Турската полиција го уапси градоначалникот на областа Нурдаги како дел од истрагата за урнатите згради во областа погодена од земјотресот, пренесе агенцијата „Анадолија“.
Океш Кавак е градоначалник на областа Нурдаги во Газиантеп, еден од најтешко погодените региони во разорните земјотреси на 6 февруари. Кавак е сопственик и на фирма која е изведувач и чии две згради се уништени во земјотресите.
По катастрофалните земјотреси во Турција се уапсени речиси 200 лица под сомнение за лоша изградба на згради кои се урнаа и во кои загинаа повеќе од 44.000 луѓе, соопшти турското Министерство за правда, пренесе Си-Ен-Ен.
Во соопштението се наведува дека 626 лица се осомничени за непочитување на прописите при изградба. Утврдено е дека некои од осомничените загинале во земјотресот, а полицијата трага по многу други.
Турскиот министер за правда Бекир Боздаг рече дека доказите за лоша градба се собрани во илјадници згради, а според државната агенција за катастрофи, повеќе од 5.700 објекти се урнати.