Уапсени седум полициски началници и службеници пoврзани со лиценцата на „Пулс“

Нови седум лица, полициски началници и службеници се уапсени денес, поради поврзаност со незаконско издавање на лиценцата на кочанската дискотека „Пулс“, во која се случи огромната трагедија во која загинаа 59 лица. Четири од приведените се началници, а три полициски службеници.

Информацијата ја потврди Јавното обвинителство со соопштение во кое стои: „Предметен јавен обвинител од Специјализираното одделение за гонење на кривични дела сторени од лица со полициски овластувања и припадници на затворска полиција, донесе Наредба за спроведување на истражна постапка против седум полициски службеници. Според дејствијата опишани во наредбата постои основано сомнение дека осомничените сториле кривично дело Тешки дела против општата сигурност.

Kако службени лица вработени во СВР Штип и ПСОН Кочани како соизвршители, осомничените изготвувајќи, потпишувајќи и одобрувајќи позитивна согласност, му овозможиле на правно лице да се стекне со лиценца за вршење угостителска дејност – кабаре иако објектот не ги исполнувал законските услови за работа.

Осомничените сите заедно предизвикале значителна опасност за животот и телото на луѓето, овозможувајќи кабарето да работи во супстандардни услови при што на 16.03.2025 година во објектот настанал пожар во кој починале 59, а 196 се здобиле со тешки телесни повреди. Ценејќи дека се исполнети условите јавниот обвинител до судијата на претходна постапка достави предлог за определување на мерка притвор за сите седум лица, стои во соопштението.