Турција изведе пред суд 11 членови на ЛГБТ здружение: Објавиле фотографии на кои се гледаат истополови парови како се бакнуваат

Единаесет членови на турското здружение за права на ЛГБТК+ беа изведени пред суд под обвинение за „развратност“ и „кршење на семејната заштита“, потврди нивниот адвокат за АФП.

Обвинетите, членови на здружението Genç LGBTI+ (Млади ЛГБТИ+), се обвинети за кршење на одредбите од турскиот устав за заштита на семејните вредности, како и за објавување фотографии на социјалните мрежи на кои се гледаат истополови парови како се бакнуваат, што властите го оценија како непристојно.

Тие се соочуваат со затворска казна до три години, како и лишување од граѓански права, доколку бидат прогласени за виновни на суд во западниот град Измир.

Иако хомосексуалноста не е нелегална во Турција, ЛГБТК+ заедницата често е цел на властите.

Претседателот Реџеп Таип Ердоган и неговата владејачка Партија на правдата и развојот (АКП) постојано ја обвинуваат заедницата за намалувањето на наталитетот во земјата.

„Судењето е резултат на политиката на исклучување на ЛГБТ+ лицата од јавниот простор“, рече адвокатот на здружението, Керем Дикмен.

„Ова е напад врз слободата на изразување и слободата на здружување“, додаде Дикман, кој самиот беше обвинет како член на надзорниот одбор на здружението.

„Не станува збор за разврат. Активностите што се целосно легални и во согласност со уставот се криминализираат. Тоа е форма на дехуманизација“, нагласи тој.

Активистите за правата на ЛГБТ+ лицата, исто така, поднесоа жалба против претходната судска одлука од декември со која се нареди распуштање на здружението врз основа на истите обвинувања.

„Нема да се откажеме од одбраната на човековите права. Но, тие се обидуваат да испратат порака до општеството преку нас“, рече Дикмен.

Следното рочиште е закажано за 14 октомври.

Предлогот за измена на турскиот кривичен законик, кој предвидуваше кривично гонење на ЛГБТК+ лица за однесување „спротивно на биолошкиот пол и општиот морал“, беше повлечен во ноември минатата година.

Од 2015 година, годишните Паради на гордоста во Турција речиси редовно се забрануваат и се дисперзираат во градовите низ целата земја.