Трудо поднесе оставка

Канадскиот премиер Џастин Трудо поднесе оставка. Тој ја напушта функцијата шеф на Либералната партија и премиер. Сепак, тој ќе остане на премиерската позиција сè додека партијата не избере ново партиско раководство.

Тој ја започна прес-конференцијата велејќи дека секое утро откако се разбудувал како премиер, е инспириран од издржливоста и дарежливоста на Канаѓаните. Тој вели дека откако станал премиер во 2015 година, се борел за Канада и нејзиниот народ, за зајакнување и раст на средната класа. Тој посочува дека гледал како земјата се обединувала за да се поддржат едни со други за време на пандемијата и како работел за да ја заштити слободната трговија на континентот.

Трудо вели дека одлуката да поднесе оставка ја донел по долги разговори со семејството – истакнува дека неговиот успех бил резултат на нивната поддршка.

Синоќа на вечерата на своите деца им ја кажал одлуката да поднесе оставка.

Тој додава дека „оваа земја го заслужува вистинскиот избор“ на следните избори. Тој, исто така, рече дека станало јасно дека ако мора да води „внатрешни битки“, тој не може да биде најдобриот избор за гласачите во Канада.

Тој тврди дека Парламентот бил „парализиран со месеци“ – што тој го нарекува најдолгата седница на малцинскиот парламент во канадската историја. Трудо понатаму наведува дека тоа е причината поради која на земјата ѝ е потребна нова седница на Парламентот и дека Парламентот ќе биде пролонгиран (одложен) до 24 март.