Тројца убиени на улица во Филаделфија

Тројца загинати и 11 повредени е епилогот по пукотниците на улица во американскиот град Филаделфија, соопшти тамошната полиција.

„Четиринаесет лица биле застрелани и хоспитализирани. Тројца од нив – двајца мажи и една жена – подоцна починале во болница од повеќе прострелни рани” – изјави инспектор од полицискиот оддел.

Кога полицијата пристигнала на местото на настанот „идентификувала неколку вооружени лица кои отвориле оган врз толпата” во областа „Саут стрит”.

„Можете да замислите дека на „Саут стрит” имаше стотици луѓе, како секој викенд, кога почна пукањето”, рекол полицискиот инспектор.

Полицијата пукала врз еден од напаѓачите, но не е прецизирано дали тој е застрелан.

Локалните медиуми јавуваат дека засега нема информации за уапсени.

На местото на пукотницие биле пронајдени два пиштола, а полицијата ќе ги користи снимките од камерите на трговските објекти во близина за расветлување на случајот.