Трамп ќе ги објави резултатите од магнетната резонанца: Направив когнитивен тест и го поминав со одличен успех

Претседателот на САД, Доналд Трамп, изјави дека е подготвен да ги објави резултатите од скенирањето со магнетна резонанца (МРИ) што го направил во октомври, нагласувајќи дека наодите се „совршени“ и дека когнитивниот тест поминал со одлични оценки.

Претседателот на САД додаде дека „нема поим“ кој дел од неговото тело е скениран.

-Тоа е само МРИ. Кој дел од телото? Не мозокот, направив когнитивен тест и го поминав со одличен успех, рече Трамп.

Неговиот коментар следеше по изјавата на демократскиот гувернер на Минесота, Тим Волц, кој за Ен-Би-Си изјави дека Трамп „физички ослабува“ и го доведува во прашање неговиот „ментален капацитет“, повикувајќи го да ги објави резултатите од МРИ прегледот.

Во исто време, за време на разговор со новинарите во авионот, Трамп беше забележан со беж фластер на десната рака, според извештаите на медиумите.

Трамп, 79, претходно потврди дека имал магнетна резонанца во Медицинскиот центар „Волтер Рид“ на 10 октомври, но ниту тој ниту Белата куќа не прецизираа кој дел од неговото тело бил прегледан.

Прегледот беше опишан како дел од неговиот „полугодишен лекарски преглед“, по неговиот прв преглед оваа година во април.

Во извештајот на Белата куќа се вели дека прегледот во октомври бил „проверка“ што вклучувал „напредно снимање, лабораториски тестови и превентивни здравствени проценки“, но не ги објави резултатите од магнетната резонанца.