Трамп сака руската агресија врз Украина да заврши до 8 август

Американскиот претседател Доналд Трамп јасно стави до знаење дека до 8 август мора да се постигне договор за прекин на војната на Русија во Украина, изјавија САД пред Советот за безбедност на ОН.

„Русија и Украина мора да се согласат на прекин на огнот и траен мир. Време е за договор. Претседателот Трамп јасно стави до знаење дека ова мора да се направи до 8 август. САД се подготвени да спроведат дополнителни мерки за да се обезбеди мир“, изјави Џон Кели, висок американски дипломат, пред 15-члениот совет.

Во вторникот, Трамп рече дека САД ќе почнат да воведуваат царини и други мерки против Русија „за 10 дена од денеска“ ако Москва не постигне напредок кон прекин на војната во Украина. Киев и Москва одржаа три рунди разговори во Истанбул оваа година, за време на кои се согласија да разменуваат воени заробеници и тела на убиени војници, но немаше никаков напредок во завршувањето на повеќе од тригодишниот конфликт.

„Имавме намера да ги продолжиме преговорите во Истанбул“, изјави заменик-постојаниот претставник на Русија во ОН, Дмитриј Пољански, пред Советот за безбедност. Продолжуваме да ги слушаме гласовите на оние кои мислат дека дипломатијата е само средство за критикување на Русија и зголемување на притисокот врз неа“, додаде Пољански.

Заменик-постојаниот претставник на Украина во ОН, Христина Хајовишин, рече дека на Русија мора да се пристапи со „единство, решителност и акција“. „Ние бараме сеопфатен, праведен и траен мир врз основа на принципите на Повелбата на ОН. Ништо помалку. Повторуваме – целосно, непосредно и безусловно прекин на огнот е апсолутно неопходно. Ова е првиот чекор кон прекинување на војната на Русија против Украина“, додаде Хајовишин.