Трамп и Фон дер Лајен ќе се сретнат во Шкотска – можно потпишување трговски договор меѓу ЕУ и САД

Претседателката на Европската комисија, Урсула фон дер Лајен, ќе се сретне со американскиот претседател Доналд Трамп во недела во Шкотска, во рамки на неговата четиридневна посета на Обединетото Кралство. Средбата, како што соопшти Европската комисија, е на покана на Трамп, и има за цел да се финализираат преговорите за потенцијален трговски договор меѓу ЕУ и САД, пишува Гардијан.

Ирскиот премиер, Михол Мартин, изјави дека постои надеж договорот да биде постигнат пред крајот на викендот. Трамп, по слетувањето во Шкотска, ја нарече фон дер Лајен „високо почитувана личност“ и додаде дека шансите за договор се „50-50“, при што најголемите предизвици се однесуваат на „дваесетина различни прашања“.

Фон дер Лајен изјави дека претходно имала „добар телефонски разговор“ со Трамп и потврди дека ќе се сретнат во недела за да разговараат за „зачувување на силните трансатлантски трговски односи“.

Претседателот на САД најави и проширување на веќе постигнатиот договор со Велика Британија, кој во мај доведе до намалување на царините на возила од 27,5 отсто на 10 отсто, во замена за зголемен увоз на американско говедско месо и етанол. Земјоделските здруженија во Велика Британија предупредија дека се загрижени од евентуално отворање на пазарот за американски млечни производи.

Во однос на можниот договор со ЕУ, Трамп рече дека постои „реална можност“, иако не гарантира успех. Тој додаде дека е подготвен за дополнително „фино дотерување“ на трговските услови, при што спомена и можност за укинување на царините за увоз на челик.

Во петокот, германскиот автомобилски производител „Фолксваген“ објави дека загубил милијарда фунти во првото полугодие како последица на тарифите наметнати од администрацијата на Трамп.

Во рамки на посетата, Трамп најави и средба со британскиот премиер, Кир Стармер, и со првиот министер на Шкотска, Џон Свини, при што изрази пофалби за двајцата. Тој повторно ја критикуваше енергетската транзиција во Европа, особено изградбата на ветерни електрани, како и нивото на миграција во ЕУ, нарекувајќи го „инвазија“.

Средбата во недела се очекува да биде одлучувачка за можниот договор меѓу ЕУ и САД, кој би опфатил основни царински стапки од 15 отсто и други трговски услови.