Поранешниот американски претседател претседател Доналд Трамп мора да ѝ плати речиси 355 милиони долари на државата Њујорк затоа што лажел за вредностите на неговиот имот, одлучи судот. Судијата Артур Енгорон, исто така, му забрани три години да работи како директор на компанија или да зема заеми од банките во државата.
Трамп, њујоршки магнат со недвижности, се спаси од стечај на некои од неговите компании, што можеше да значи банкрот. Говорејќи од својот имот на Флорида, Трамп рече дека ќе поднесе жалба на пресудата.
Во пресудата, образложувајќи ја високата казна, судијата Енгорон се осврна на други кривични дела на обвинетите, и рече дека казната е оправдана оти тие „веројатно ќе продолжат со своите измамнички начини“ освен ако не наметне „значајна“ казна. Тој конкретно се осврна на пресудата на Организацијата Трамп во случајот за криминална даночна измама во 2022 година, каде што поротата откри дека највисоките директори повеќе од една деценија се богателе со даночно затајување.
„Нивниот целосен недостаток на покајание и каење се граничи со патолошки“, напиша судијата Енгорон во понекогаш острата одлука од 92 страници. Подоцна тој рече: „Измамите пронајдени овде ја шокираат совеста“.
Сепак, империјата на Трамп е поштедена од еден од најлошите потенцијални исходи – откажувањето на нејзините деловни лиценци, познато како корпоративна смртна казна. Наместо тоа, судијата нареди две нивоа на надзор – независен монитор да известува до судот до три години и да се постави посебен независен директор за усогласеност со пресудата.
Правните долгови на Доналд Трамп сега може да надминат половина милијарда долари. Новата строга казна следи само неколку недели откако на Трамп му беше наредено да плати 83,3 милиони долари на писателката Е. Џин Керол поради оштетување на нејзиниот углед, откако таа го обвини за сексуален напад. Посебно жири минатата година ѝ додели на Керол 5 милиони долари од Трамп за сексуална злоупотреба и клевета. Згора на казните има и плаќања камати и пресудите би можеле да му нанесат неверојатен удар на личното богатство што останува суштинско за политичката привлечност на Трамп. Тој категорично негираше дека сторил кривични дела и рече дека ќе поднесе жалба, процес кој може да трае со месеци, па дури и со години.