Трамп вели дека упадот на руски беспилотни летала е „можеби грешка“, Полска остро реагираше

Американскиот претседател Доналд Трамп синоќа посочи дека руските беспилотни летала што го нарушија полскиот воздушен простор можеби го направиле тоа случајно, нарекувајќи го инцидентот „грешка“. Таквиот коментар предизвика остра осуда од Полска и нејзините европски сојузници, кои го оценија како опасно и погрешно толкување на ситуацијата, пишува Киев пост.

„Можеше да биде грешка“, им рече Трамп на новинарите, додавајќи дека „не е задоволен од ништо во целата ситуација, но се надева дека ќе заврши“. Неговите зборови се во остра спротивност со реакциите на европските лидери, кои го нарекоа инцидентот „намерна провокација“ и „нова, сериозна ескалација“ на конфликтот.

Најмалку 19 руски беспилотни летала влегоа во полскиот воздушен простор завчера за време на нападот врз Украина, што ги натера авионите на НАТО да соборат четири од нив, потврди полскиот премиер Доналд Туск.

Полскиот министер за надворешни работи Радослав Сикорски директно ја негираше проценката на Трамп. „Не, не беше грешка“, напиша тој кратко на социјалните мрежи.

Полските и другите европски претставници ја нагласија сериозноста на инцидентот, велејќи дека беспилотните летала летале дури 480 километри (300 милји) длабоко на полска територија.

Европските сојузници ја поддржуваат Полска

Како знак на солидарност, неколку европски земји, вклучувајќи ги Чешката Република и Холандија, ги повикаа руските амбасадори на разговори во нивните министерства за надворешни работи.

Покрај дипломатскиот потег, Чешката Република, исто така, одлучи да испрати воена помош во Полска. Министерството за одбрана во Прага потврди во четврток дека ќе испрати хеликоптерска единица за специјални операции против беспилотни летала на директно барање на својот полски колега.

Франција, исто така, презеде конкретни воени чекори. Претседателот Емануел Макрон објави дека испраќа три борбени авиони „Рафал“ за „да помогнат во заштитата на полскиот воздушен простор и источниот крило на НАТО заедно со нашите сојузници“.

Тест за НАТО и „фатална слабост“

Пензионираниот полковник на американската армија Ричард Вилијамс, ветеран со искуство во лидерството во НАТО, изјави за „Киев пост“ дека нападот со беспилотни летала бил „намерен“ и тест за политичката волја на алијансата.

„Едно е да се има капацитет за возврат – друго е да се има политичка волја за тоа“, забележа Вилијамс. Тој предупреди дека „фаталната потенцијална слабост“ на НАТО е тоа што е „слаб како и неговата најслаба алка, а особено неодлучен како неговата најспособна водечка нација“, алудирајќи на „неподготвеноста на САД и Трамп да ја нападнат Русија“ или „да ризикуваат војна со Москва“.

Јуриј Бојечко, извршен директор на американската хуманитарна организација „Надеж за Украина“, исто така изрази остра критика за пристапот на Трамп. Тој верува дека рускиот претседател Владимир Путин „гледа дека царот е гол“ и „продолжува да ја преминува една црвена линија по друга“.

„Поради Трамп, НАТО и САД изгледаат слаби“

Бојечко ги спореди постапките на сегашната администрација со оние на поранешниот претседател Џо Бајден, за кого тврди дека „ја снабдувал Украина со оружје, вовел санкции врз Русија, го изолирал Путин на светската сцена и ги обединил западните сојузници“. Според него, „овие решителни постапки… ја ограничиле агресијата на Путин во Украина“.

Спротивно на тоа, тврди Бојечко, Трамп „ја намалил поддршката“, „ги минимизирал испораките на оружје за Украина“ и „го заштитил Путин од нови санкции“, што ги прави САД и НАТО „да изгледаат слаби“.

„Путин сега е охрабрен – испраќа смртоносни дронови во Полска неказнето, знаејќи дека нема да има последици“, рече Бојечко. Тој заврши со предупредување: „Ако Путин не се соочи со последици за намерно испраќање повеќе дронови во земја-членка на НАТО, тогаш може слободно да се каже дека НАТО е ефикасно мртов како безбедносен сојуз. И тоа, за жал, би бил уште еден „успех“ на претседателствувањето на Трамп“.