Топлотен бран зафати делови од Кина, САД, но и од Европа, најмногу на Пиринејскиот Полуостров.
Кинеските метеоролози предвидуваат дека температурата во некои градови во следните 24 часа ќе достигне 40 степени Целзиусови, пренесува лондонски „Гардијан“.
Во Шангај, најнаселениот град во Кина, властите ги предупредија жителите да се подготват за невообичаено топло време. Од почетокот на температурните рекорди во 1873 година, Шангај има само 15 дена со температури над 40 степени Целзиусови.
Југозападните и централните области на САД се соочуваат со екстремна жештина, со 42,2 степени Целзиусови во Вако и рекордни температури измерени минатиот викенд во градови во Тексас, Колорадо, Оклахома и Арканзас.
Се предвидува пад на температурите во Тексас до крајот на неделата, додека во Аризона ќе продолжи да расте и до следниот петок во главниот град на државата Феникс ќе достигне 45 степени Целзиусови.
Шпанија е зафатена од вториот топлотен бран ова лето, со температури кои оваа недела достигнаа 44 степени Целзиусови во некои региони во јужниот и југозападниот дел на земјата. Топлотниот бран во Шпанија, што почна минатата сабота, се очекува да продолжи и претстојниот викенд.