Врховниот суд на американската сојузна држава Колорадо во вторникот го прогласи поранешниот американски претседател Доналд Трамп за неподобен за Белата куќа врз основа на стара и ретко користена одредба од Уставот на САД со која се забранува учество на бунтовниците на власт и ја забрани можноста да се кандидира во таа држава за време на претседателските избори следниот ноември, 2024 година.
Тоа води до веројатна пресметка меѓу адвокатите во Врховниот суд на САД, кои ќе треба да одлучат дали Трамп, како фаворит за републиканската номинација, може да остане во трката.
Одлуката на судот, чиишто судии беа именувани од демократски гувернери, е прва во историјата што Дел 3.14. амандманот на Уставот на САД се користи за дисквалификување на претседателски кандидат.
Така одлучи највисокиот суд во Колорадо, поништувајќи ја пресудата на судијата на окружниот суд, кој иако утврди дека Трамп поттикнал бунт со неговата улога во нападот на Капитол во Вашингтон на 6 јануари 2021 година, рече дека не може да му биде забрането да учествува во изборите бидејќи не е јасно дали одредбата од Уставот на САД се однесува и на претседателот.
„Не ја донесовме нашата одлука лесно“, напишаа судиите на Врховниот суд во Колорадо.
„Свесни сме за големината и тежината на прашањата пред нас. Свесни сме и за нашата свечена должност да го применуваме законот без страв или наклоност и без оглед на неговиот ефект врз реакцијата на јавноста на одлуките што законот ги бара да ги донесеме“ велат тие.
Адвокатите на Трамп ветија дека веднаш ќе се жалат до Врховниот суд на САД, кој го има последниот збор за уставните прашања.
Кампањата на Трамп, исто така, соопшти дека работи на одговор на пресудата.
Во 2020 година, Трамп загуби во Колорадо за 13 процентни поени, а таа држава нема да му треба за да победи на претседателските избори следната година, во 2024 година. Но, опасноста за поранешниот претседател е дека низа американски државни судови и изборни службеници ќе го следат примерот на Колорадо и ќе го исклучат Трамп од трката во државите што би требало да ги освои за повторно да стане претседател на САД.
Официјални лица од Колорадо велат дека проблемот мора да се реши до 5 јануари, крајниот рок во кој државата треба да ги испечати своите гласачки ливчиња за претседателските избори во ноември.