Српската полиција влезе во ВМА поради случајот со приведениот активист Миша Бачулов

Српската полиција влезе во Военомедицинската академија во Белград со цел да го пронајде лицето кое требало да му обезбеди на активистот и советник од Нови Сад, Миша Бачулов, отров што би предизвикал симптоми на труење, но не би го загрозил неговото здравје, јави Радио телевизија на Србија.

Според РТС припадници на Управата за криминалистичка полиција, по наредба на Вишото јавно обвинителство во Белград, влегле во просториите на Одделот за токсикологија на ВМА со цел да идентификуваат, засега, непознато лице кое, како што е наведено, имало задача да му обезбеди на Бачулов соодветна доза од отровот „рицин“, што би предизвикал симптоми на труење, но не би го загрозил неговото здравје.

Советникот од Нови Сад, Миша Бачулов, и Д.Ц. беа уапсени вчера под сомнение за заговор и планирање да биде отруен Бачулов (43) и да го обвинат за тоа претседателот на Србија и државниот врв.
Постојат сомневања дека тие планирале и договарале дејствија што создаваат услови за итно извршување на кривичното дело напад врз уставниот поредок, соопшти обвинителството.
Бачулов попладнево беше примен во Ургентниот центар во Белград поради болка во градите.