Софија ги мобилизирала сите ресурси за заштита на бугарските ставови околу Македонија

Бугарија ги мобилизираше „сите расположливи ресурси и воспоставени канали за заштита на бугарскиот национален интерес“, а примени и механизми на дискретна дипломатија за да ги убеди сите свои партнери во потребата од воздржаност и конструктивен пристап кон европската интеграција на Македонија. Ова го изјави министерот за надворешни работи Георг Георгиев како одговор на пратеничко прашање од Елисавета Белобрадова (ПП-ДБ), јавуваат бугарските медиуми.

Министерот за надворешни работи изјави дека неговиот оддел ги дели загриженостите јавно изразени од бугарските европратеници за можното компромитирање на процесот на подготовка на извештајот на Европскиот парламент (ЕП) за напредокот на Северна Македонија.

„Вклучително и од гледна точка на постоењето на незаконско протекување на внатрешни парламентарни информации до трета страна за содржината на нацрт-документот и нерегулирано лобирање меѓу претставниците на ЕП и службениците од Скопјe“, изјави Георгиев.

Во последните недели, односите меѓу Скопјe и Софија се влошија откако, на барање на бугарските европратеници, Европскиот парламент одлучи да го одложи гласањето за извештајот за напредокот на Северна Македонија. Бугарските европратеници објавија дека имало неприфатливо протекување на информации до Скопјe и се изјаснија против коментарите во извештајот во врска со македонскиот идентитет и јазик.

Подготвениот извештај, чие усвојување беше одложено, на неколку места содржи признавање на македонскиот идентитет и јазик, што бугарските европратеници не го прифатија.

„Ваквите нерегулирани дејствија само служат на ескалирачкиот националистички наратив на премиерот на Северна Македонија. За Министерството за надворешни работи и нашите дипломатски мисии во странство, застапувањето на ставот за строго спроведување на европскиот консензус останува прашање од највисок приоритет“, рече министерот Георгиев.

Тој истакна дека меѓународното право не се занимава со признавање на идентитетот и јазиците, а тоа важи и за случајот со Македонија.

„Формулации како ‘признавање на македонскиот идентитет’ и ‘признавање на македонскиот јазик’ не се категории на меѓународното право што подлежат на признавање и не се елемент на Копенхашките критериуми за членство во ЕУ или одредбите поврзани со процесот на проширување“, објасни министерот за надворешни работи.

„Во контекст на едностраното попречување на напредокот во процесот на европска интеграција на Република Македонија од страна на владата во Македонија, Бугарија ја нагласува потребата од избегнување дејствија што можат да доведат до појава на нови проблеми“, истакнува Георгиев.