Преземени се охрабрувачки чекори за враќање на атмосферата на доверба меѓу Унгарија и Украина, „иако патот пред нас е долг и ќе биде потребна многу работа“, изјави денеска унгарскиот министер за надворешни работи Петер Сијарто, додавајќи дека Будимпешта е подготвена за тоа.
Билатералните односи се влошија „бидејќи правата на закарпатските Унгарци се ограничуваат повторно и повторно од 2015 година“, рече Сијарто на заедничката прес-конференција по разговорите со неговиот украински колега Дмитро Кулеба.
– Тој додаде дека во односите доминирале нерешени прашања, а не добри односи, се вели во соопштението на Министерството.
Сијарто рече дека законот усвоен од украинскиот парламент минатиот декември несомнено ја запре оваа негативна спирала, но дека владата очекува правата на Закарпатската унгарска заедница да се вратат на нивото од 2015 година.
„Сакам да нагласам дека Унгарија не сака никаков посебен третман, не сакаме ништо што немавме порано“, рече тој.
Унгарија, додаде тој, подготви листа од 11 точки на барања, вклучувајќи враќање на статусот на училиштата за етничките малцинства, можност за матура на унгарски, како и неограничена употреба на унгарскиот во високото образование, културата, јавните служби и заедниците.
Министрите назначија билатерален меѓувладин комитет за финализирање на предлогот, додаде тој.
– Позицијата на Унгарија за Украина е јасна и конзистентна во последните две години, рече Сијарто.
„Ние се залагаме за територијалниот интегритет и суверенитет на Украина. Ја осудуваме војната и сакаме мир во нашето соседство“, нагласи тој.
Сијарто повика на обновени напори за враќање на мирот во Украина.
„Унгарија е подготвена да продолжи со таквите напори, бидејќи знаеме дека може да се спасат животи само кога ќе има мир“, рече тој.