Се повеќе странски медиуми ја прекинуваат работата во Русија

Голем дел од медиумите ја прекинуваат работата во Русија, по одлуката на рускиот Парламент да го ограничи известувањето за вестите за инвазијата на земјата на Украина.

Германските јавни радиодифузери АРД и ЗДФ објавија дека засега го прекинуваат покривањето од нивните московски студија, но „ќе продолжат да ја информираат јавноста за настаните во Русија и Украина од нивните други локации“.

Голем број западни медиумски организации ги прекинаа своите активности во Русија по репресијата на Москва врз странските медиуми.

Путин во петокот потпиша нов закон кој ќе значи високи парични казни и до 15 години затвор за ширење лажни информации за вооружените сили на земјата.

Тикток ќе прекине голем дел од својата услуга во Русија.

Си-Ен-Ен ќе престане да емитува програма во Русија.  „Ќе престанеме да емитуваме додека продолжуваме да ја оценуваме ситуацијата и нашите следни чекори напред“, изјавија од американската телевизија.

Москва официјално ја нарекува инвазијата на Украина „воена операција“ и веќе им забрани на медиумите да користат термини како „напад“ или „инвазија“.

Би-Би-Си во петокот објави дека планира да ја запре работата на своите новинари во Русија. Во неделата, портпаролот на радиодифузерот потврди дека нејзината меѓународна програма на BBC World News, која се емитува во многу земји надвор од Британија, е блокирана во Русија од саботата.

Радио Слободна Европа/Радио Слобода (РСЕ/РЛ), финансирана од САД, во саботата соопшти дека ќе ја прекине работата во Русија.

Други европски медиуми, вклучително и шпанската државна новинска агенција ЕФЕ, весникот Ел Паис и радиодифузерот РТВЕ, како и италијанскиот радиодифузер Раи, исто така ги прекинаа своите активности во Русија.