Српскиот претседател Александар Вучиќ изјави денеска дека ниту едно парче српско оружје, орудија или муниција не е продадено на Русија или Украина и дека оние кои го тврдат спротивното се „лажговци, свиркачи и треба да се срамат бидејќи и нанесуваат штета на Србија“.
„За Србија, во согласност со меѓународните закони, постојат таканаречени дозволени корисници, а Србија може да извезува само во такви земји. Направивме се во согласност со законот, чисти сме како солза“, изјави Вучиќ во Доха, каде што учествува на конференција организирана од Обединетите нации.
Во врска со тврдењето дека од Србија преку Турција се извезува оружје во Украина, тој рече дека Србија „дополнително се заштитила“ знаејќи дека постои можност дел од стоката да заврши на друго место.
„Додадовме дека е невозможно да се извезе муницијата што ја дадовме во Турција без наша согласност“, рече Вучиќ, истакнувајќи дека Србија „не принудила никого да војува“.
На прашањето за Косово, тој повтори дека Србија „ќе се соочи со тешки притисоци“ и дека „претходните денови имаше безброј лаги и невистини“.
„Многумина беа ужасно нервозни, лути, надевајќи се дека ќе потпишам нешто и дека ќе можат да кажат дека Србија изгубила, иако никогаш не биле загрижени за Србија, туку само за нивните фотелји и дали можат да се фатат за тие фотелји и да се полни благајна, за која не одговараат“, рече Вучиќ.
Како што додаде, тие луѓе велат дека денес ситуацијата е поинаква – велат 26 или 27 земји го повлекле признавањето, се фалат со се што направил, но никогаш не направиле.
„Во нивно време ниту една земја не го повлече признавањето на Косово. И сега ги слушаме оние луѓе кои ни го солат мозокот повикувајќи се на резултатите што ги создадовме. Тогаш се прашувате кој е овде луд“, рече Вучиќ.