Светски берзи: И покрај забавувањето на инфлацијата во САД, берзите во црвено
Изминатата трговска недела донесе позитивни информации за потрошувачките цени во САД, но за разлика од неодамнешното минато, овој извештај не беше доволен за да предизвика посилно позитивно расположение на пазарот.
Референтниот индекс на американскиот пазар, S&P 500, ослабна за 0,3 отсто, додека индексот на технолошките акции, Nasdaq, во неделата порасна за 0,4 отсто.
Инфлацијата во САД продолжи со надолен тренд во април, паѓајќи на 4,9 отсто, нешто под консензусот и минатомесечната годишна стапка од 5 отсто.
Податоците од април претставуваат значително подобрување во однос на јунскиот максимум од 9,1 отсто и најниското ниво на индексот на потрошувачките цени од април 2021 година.
Сепак, базичната инфлација, која ги исклучува нестабилните ставки како што се цените на храната и енергијата, порасна за 0,4 отсто месечно и 5,5 отсто на годишно ниво, но беше во согласност со очекувањата. Трошоците за домување, гориво и половни возила придонесоа за растот на цените, делумно компензирани со падот на цената на горивата, новите возила и храната за домаќинствата.
И додека инфлацијата релативно брзо се преполови, ФЕД се соочува со многу посериозна задача да ја сведе на повеќегодишната цел на централната банка од два проценти. Во борбата против инфлацијата, ФЕД ја зголеми каматната стапка за пет процентни поени на највисоко ниво во последните 16 години на десет последователни седници од март минатата година.
Пазарот сега очекува дека ФЕД би можел да паузира со продолжување на зголемувањето на каматните стапки, а по објавениот извештај, веројатноста за зголемување на каматните стапки во јуни падна на ниво од 20 отсто.
Иако инвеститорите позитивно реагираа на извештајот за инфлација, овојпат расположението не беше толку изразено како во изминатите неколку најави. Финансиските акции, како и остатокот од пазарот, остануваат под притисок од проблемите со кои се соочуваат регионалните банки, бидејќи се приближува датумот кога американската влада би можела да престане да ги плаќа сметките доколку Конгресот не одобри зголемување на плафонот на долгот.
Придонес за негативното расположение на пазарот во петокот беше потрошувачкото расположение на Универзитетот во Мичиген, кое падна на полугодишен минимум во мај, додека изгледите за петгодишната инфлација скокнаа на највисокото ниво во последната деценија.
На корпоративен план, сезоната на објавување на резултатите за првиот квартал привршува и по 90 отсто од објавените извештаи, добивките на американските корпорации се полоши за четири отсто, што е подобро од првичните очекувања.
Неделата ја одбележа најавата на медиумскиот конгломерат Дизни, кој уште еднаш забележа пад на бројот на претплатници на стриминг платформата Дизни+, што всушност направи одреден напредок на патот да стане профитабилен.
Тематските паркови придонесоа за солидни резултати на компанијата, но проблемите во медиумскиот сегмент ги оставија акциите на Дизни практично на нивоата на врвот на пандемијата.