САД потпишаа трговски договори со Малезија, Тајланд и Камбоџа

Американскиот претседател Доналд Трамп денеска за време на самитот на Асоцијацијата на земјите од Југоисточна Азија (АСЕАН) во Куала Лумпур, потпиша трговски договори и договори за пристап до ретки минерали и метали со Малезија, Камбоџа и Тајланд.

Договорите беа договорени на маргините на форумот, а нивното потпишување означува нова фаза во економската дипломатија на Вашингтон во Азија.

Договорите со Камбоџа и Тајланд беа склучени по церемонијата на која лидерите на двете земји го потврдија продолжувањето на прекинот на огнот меѓу нив, постигнат по петдневниот пограничен конфликт во јули. Претседателот Трамп нагласи дека прекинот на борбите е услов за постигнување на трговските договори.

Во Куала Лумпур, Доналд Трамп и малезискиот премиер Анвар Ибрахим потпишаа трговски договор и „пакт за ретки минерали“ насочен кон зголемување на билатералната трговија и зајакнување на синџирите на снабдување со ретки земјини елементи. Договорите имаат за цел да одговорат на зголемените ограничувања на Кина за извоз на стратешки суровини.

Според договорот, Малезија ќе обезбеди „значаен преференцијален пристап“ за американски хемикалии, машини, електрична опрема, метали, автомобили и земјоделски производи. Земјата ќе ги отстрани ограничувањата за извоз на ретки минерали во Соединетите Американски Држави и ќе го забрза развојот на секторот преку партнерства со американски компании, вклучително и доделување лиценци за рударство и преработка. Во текот на следните пет години, малезиските компании ќе купуваат полупроводници, воздухопловни компоненти, опрема за телекомуникации од американски производители во вредност од 150 милијарди долари. Договорот, исто така, вклучува инвестиции во САД од 70 милијарди долари во текот на следната деценија.

Трамп, исто така, потпиша трговски договор со Камбоџа со кој се ослободуваат стотици категории стоки од реципрочни царини, како и рамковен договор со Тајланд за соработка во секторот за ретки земјени елементи.

Посетата на Доналд Трамп на Малезија е дел од турнејата низ три земји во Азија што ќе продолжи со посети на Јапонија и Јужна Кореја. Се очекува кулминацијата да биде средбата на Трамп со кинескиот претседател Си Џинпинг, закажана за 30 октомври во Сеул.