САД нема повеќе да споделува податоци за загадување на воздухот

Владата на САД ќе престане да ги споделува податоците за квалитетот на воздухот собрани од нејзините амбасади и конзулати. Оваа одлука предизвика загриженост кај локалните научници и експерти, кои сметаат дека таа програма е клучна за следење на глобалниот квалитет на воздухот.

Како одговор на барањето на Асошиејтед прес, Стејт департментот пред три дена потврди дека неговата програма за следење на квалитетот на воздухот повеќе нема да пренесува податоци за загадувањето од амбасадите и конзулатите до апликацијата AirNow на Американската агенција за заштита на животната средина (EPA) и други платформи, кои им овозможија на научниците и локалните жители ширум светот да го анализираат квалитетот на воздухот во различни градови.

Прекинот на споделувањето податоци е резултат на буџетските ограничувања што доведоа до исклучување на основната мрежа, се вели во соопштението. Се додава дека амбасадите и конзулатите добиле инструкции да ги задржат мониторите вклучени и дека споделувањето податоци може да продолжи во иднина доколку се обезбеди финансирање.