САД и НАТО развиваат план за испраќање оружје во Украина со европски средства

САД и НАТО работат на нов пристап за снабдување на Украина со оружје, користејќи ги средствата на земјите од НАТО за плаќање на купувањето или трансферот на американско оружје, според три извори запознаени со ова прашање.

Обновената трансатлантска соработка за Украина доаѓа откако американскиот претседател Доналд Трамп изрази фрустрација од континуираните напади на Москва врз својот сосед.

Трамп, кој првично имаше посмирен тон кон Русија додека се обидуваше да ја заврши повеќе од тригодишната војна во Украина, се закани со царини и други мерки ако Москва не покаже напредок кон завршување на конфликтот до 8 август.

Претседателот минатиот месец изјави дека САД ќе и испорачуваат оружје на Украина, платено од европските сојузници, но не посочи како тоа ќе се направи.

-Земјите од НАТО, Украина и САД развиваат нов механизам кој би се фокусирал на испорака на американско оружје во Украина од Листата на приоритетни барања за Украина, позната под акронимот ПУРЛ, велат изворите.

Украина ќе даде приоритет на оружјето што ѝ е потребно во транши од околу 500 милиони долари, а сојузниците на НАТО – координирани од генералниот секретар на НАТО, Марк Руте – потоа ќе преговараат меѓу себе кој ќе донира или ќе плати за предметите на листата.

Со овој пристап, сојузниците на НАТО се надеваат дека ќе обезбедат оружје во вредност од 10 милијарди долари за Украина, изјави европски функционер кој зборуваше под услов да остане анонимен. Не беше јасно во кој временски рок се надеваат да го испорачаат оружјето.

-Тоа е почетна точка и тоа е амбициозна цел кон која работиме. Во моментов сме на таа траекторија. Ја поддржуваме амбицијата. Ни треба таа количина, рече европскиот функционер.

Висок воен функционер на НАТО, исто така зборувајќи под услов да остане анонимен, рече дека иницијативата е „доброволен напор координиран од НАТО во кој сите сојузници се охрабруваат да учествуваат“.

Службеникот рече дека новата шема вклучува сметка на НАТО, каде што сојузниците можат да депонираат пари за оружје за Украина, одобрени од врховниот воен командант на НАТО.

Седиштето на НАТО во Брисел одби да коментира. Белата куќа, Пентагон и украинската амбасада во Вашингтон не одговорија на барањата за коментар. Руските сили постепено напредуваат во Украина и контролираат една петтина од украинската територија.