Според заклучокот на Амнести интернешенал – рускиот воздушен напад во март, врз театарот во украинскиот град Мариупол е воено злосторство.
Организацијата за човекови права три месеца собираше докази за злосторството и своите наводи ги претстави во извештајот.
Доказите вклучуваат 52 изјави на сведоци, од кои 28 биле дадени од луѓе кои биле во или во близина на театарот во моментот на нападот.
„По неколку месеци ригорозна истрага, анализа на сателитски снимки и интервјуа со десетици сведоци, заклучивме дека нападот е јасно воено злосторство извршено од руските сили“ – изјави Агнес Каламар, генерална секретарка на Амнести интернешенал.
Организацијата заклучи дека е речиси сигурно дека руските воени авиони на 16. март фрлиле две бомби од 500 килограми врз зградата на театарот, што во тој момент бил преполн со цивили.
АИ откри дека во воздушниот напад загинале најмалку 12 лица, а многу се сериозно повредени.