Романското обвинителство поднесе обвинение против Калин Ѓорѓеску

Романското обвинителство денеска покрена  обвинение против Калин Ѓорѓеску, лидерот на екстремната десница и главен кандидат на минатогодишните откажани претседателски избори, за обид за поткопување на националната безбедност.

Обвинителството објави дека доказите покажуваат дека по откажувањето на изборите, Ѓорѓеску заедно со Хорацио Потра, поранешен француски легионер, планирале насилни протести, објавија британските медиуми, додавајќи дека не е познато кога ќе започне судењето.

Покрај Ѓорѓеску, обвинителството обвини уште 21 лице, вклучувајќи го и Потра.

Обвинителството објави дека Потра, по тајна средба со Ѓорѓеску, формирал „паравоена група од 21 член која одлучила да оди во главниот град Букурешт за да започне протести со цел да добие широка поддршка од населението против институциите на владеењето на правото“.

Главниот обвинител Алекс Флорента изјави дека кривичните истраги откриле серија хибридни напади врз Романија во текот на изминатата година, насочени кон гласачите и ослабувајќи ги државните институции.

Кампањата вклучувала кибер напади, јавни настани и онлајн дезинформации, а Москва негираше вмешаност во кампањата за дезинформации.

Флорента додаде дека Ѓорѓеску имал корист од интензивните онлајн кампањи, а податоците покажуваат дека поранешниот претседателски кандидат промовирал содржина во повеќе од 40 онлајн групи познати по ширење дезинформации, со вкупно 1,3 милиони членови.

Романија, членка на ЕУ и НАТО, ги откажа претседателските избори минатиот декември поради сомневања за руско мешање во корист на Ѓорѓеску, кој е остар критичар на НАТО, Брисел и западната поддршка за Украина.

Изборите беа повторени во мај, а на нив победи  проевропскиот центрист Никушор Дан.

На Џордеску му е забрането повторно да се кандидира, против него се водат две истраги, а тој негира какво било кривично дело.