Премиерот на Албанија, Еди Рама верува дека секоја земја од Западен Балкан еден ден ќе биде членка на Отворениот Балкан.
Рама изјави дека е „на страната на косовската влада и во однос на признавањето е загрижен“, но посочи дека има различно мислење од „косовската влада кога е во прашање дијалогот со Србија и пристапот кон ОБ“.
„Верувам дека Косово треба да учествува во ОБ и дека треба да одат на средба со претседателот Вучиќ. Тој вели дека секој може да седне на таа маса“ – рече Рама.
На прашањето дали може да го замисли премиерот Курти да седне на иста маса со другите челници на ОБ, Рама одговори потврдно.
„Се разбира. Имам капацитет да замислам работи на кои другите никогаш не би помислиле. Тоа не е лудост, не е глупост, туку храброст, амбиција и верба. Амбициозно сакам да изградам мир со другите и имам храброст да го кажам тоа. Верувам дека и тоа ќе се случи. Косово еден ден ќе биде во ОБ. Нема сомнеж во тоа, бидејќи тоа е иднината. Убеден сум дека секоја земја во регионот ќе биде дел од ОБ“ – нагласи Рама.