Албанскиот премиер Еди Рама денеска во Скопје изјави дека земјите од регионот на Западен Балкан треба да ги стават потребите на своите граѓани на прво место и да ги остават настрана политиката и историјата, за да ја искористат можноста за пристап до единствениот пазар на Европската унија.
„Тука сме да разговараме, заедно со американските и европските претставници, за главните чекори што треба да ги преземеме што ќе не доближат до Европската унија“, рече Рама пред почетокот на средбата на лидерите на Западен Балкан и ЕУ за планот за раст на Западен Балкан.
Рама рече дека разговарале за Планот за раст и „можност што досега ја имаа само земјите-членки на ЕУ, а тоа е пристап до единствениот пазар“.
„Ова е голема промена и можност што не смееме да ја пропуштиме и важно е шесте балкански земји да ги стават потребите на своите граѓани на прво место и да ги остават настрана политиката и историјата“, рече Рама.