Претседателот на Бугарија – Румен Радев вели дека темата за Северна Македонија и дискриминацијата на македонските Бугари е поведена пред една година во Европската Унија.
„Темата за Северна Македонија како земја што ги дискриминира нашите сонародници почна да се иницира пред една година. Проблемот не е билатерален, туку европски, бидејќи влијае на темелите на ЕУ во однос на критериумите од Копенхаген. Јас го дадов предлогот да донесеме заедничка одлука, наше главно барање да биде промена на Уставот на РСМ за македонските Бугари да бидат впишани покрај другите државотворни народи. И не само тоа, јас предложив ова да биде предуслов за почеток на преговорите за укинување на ветото“ – изјави Радев, пренесува „БГНЕС“
Тој вели дека Макрон работи со сите европски лидери за да се оствари нивното барање. Бугарскиот претседател побара да се прави разлика помеѓу францускиот предлог и протоколот, кој е составен дел од преговарачката рамка, а кој е разработен во Софија и во Скопје.
„Мора да има разлика кога се вели француски предлог – тоа е формирањето на преговарачката рамка, која го вклучува условот за Уставот, што е исклучително важно, и ова е правична одлука. Но, другиот дел, протоколот, кој е составен дел на рамката, се развива овде и во Северна Македонија. Очекував повеќе од овој протокол бидејќи содржи гаранции и детали за други прашања, со кои францускиот предлог ги гарантира човековите права“ – објасни Радев.
Според него, голем грев е што политичките елити во Софија ги заборавиле своите сонародници во Северна Македонија и што не биле спомнати ниту во Договорот за добрососедство од 2017 година ниту кога ГЕРБ го стави првото вето за почеток на преговорите во 2020 година.