Путин: Москва е подготвена да се вклучи во мировниот процес меѓу Азербејџан и Ерменија

По разговорите со азербејџанскиот претседател Илхам Алиев во Баку на 19 август, рускиот претседател Владимир Путин изјави дека Москва е подготвена да се вклучи во процесот на потпишување мировен договор меѓу Азербејџан и Ерменија врз основа на трилатералните договори постигнати по 44-дневната војна меѓу двете јужнокавкаски нации во 2020 година.

„Ние сме, исто така, подготвени да го олесниме разграничувањето и демаркацијата на азербејџанско-ерменската границата, бидејќи поседуваме соодветни документи од советско време; деблокирање на прекуграничните рути; воспоставување хуманитарни контакти“, рече Путин, нагласувајќи дека „стабилен мир во Јужен Кавказ одговара на длабоките интереси на сите народи во регионот“.

Алиев пак изјави дека е „многу задоволен“ од моменталната состојба на руско-азербејџанските односи.

Шефот на Институтот за политички менаџмент со седиште во Баку, Азер Касимли, за Радио Слободна Европа изјави дека главните прашања за кои разговарале Путин и Алиев се поврзани со враќањето на контролата на Баку врз отцепениот регион Нагорно-Карабах во септември лани, што доведе до распуштање на сепаратистичката етничка ерменска влада во регионот.

Според Касимли, Путин бара начини за продажба на руски гас во Европа преку Азербејџан поради санкциите што Западот ги наметна на Русија поради нејзината тековна инвазија на Украина.

„Русија се обиде да го собори [ерменскиот премиер Никола Пашинијан и да донесе проруски политичари на власт. Тоа не успеа, владата на Пашинијан зајакна и го избра курсот за приближување кон Западот“, рече Касимли, додавајќи дека тензијата меѓу Азербејџан и Ерменија останува многу високо и може да доведе до „нов бран судири“.

Путин пристигна во дводневна официјална посета на Баку на 18 август.

Неговата посета доаѓа во време кога Азербејџан и Ерменија преговараат за мировен договор.

Нагорно-Карабах, кој е меѓународно признат како дел од Азербејџан, беше претежно населен со етнички Ерменци и три децении беше под нивна контрола.

Откако Баку ја врати контролата врз отцепениот регион, односите меѓу Русија и Ерменија станаа тензични.

Ереван ја обвини Москва дека не ги исполнила своите обврски откако руските трупи стационирани во Нагорно-Карабах, како дел од договорот за прекин на огнот од ноември 2020 година, отфрлија каква било вмешаност во победничката офанзива на Баку во септември.