Рускиот претседател Владимир Путин денеска ја посети руската ексклава Калининград, сместена меѓу две членки на НАТО, во услови на тензии меѓу Москва и западните земји поради руската инвазија на Украина.
Путин ја започна својата посета со средба со учениците на денот на почетокот на учебната година, при што одговараше на многу прашања од областа на економијата, во врска со вселенската програма до офанзивата на Москва против Украина, а видеото беше емитувано во живо на руски телевизија.
„Нашата мисија и мисијата на нашите војници е да ја запреме војната на Киев против Донбас (што е име за источниот дел на Украина) и да ги заштитиме луѓето и, се разбира, да ја браниме самата Русија“, рече Путин.
Рускиот претседател рече и дека жителите на Донбас, област во која живеат голем број луѓе што зборуваат руски, „се сметаат себеси за дел од културниот и јазичниот простор на Русија“.
Пристигнувањето на Путин во Калининград се случи во време на големи тензии околу руската ексклава на Балтичкото Море, сместена меѓу Полска и Литванија, две членки на НАТО, за време на војната меѓу Русија и Украина.
Во јуни, Литванија престана да го одобрува транзитот на стоки во Калининград бидејќи применува санкции наметнати од Европската унија кон Москва поради нејзината агресија врз Украина.