Претседателот на Русија – Владимир Путин им се обрати на војниците кои се борат во Украина по повод Денот на националната гарда. Им рече дека „борбата вклучува зголемен ризик“.
„Ви го честитам Денот на руската национална гарда. Националната гарда, која беше основана пред шест години, стана незаменлив и сигурен дел од државниот систем кој обезбедува владеење на правото и спроведување на законот и ги штити правата и интересите на нашите граѓани“ – рече Путин.
„Би сакал посебно да се обратам до персоналот на Националната гарда вклучен во специјалната воена операција во Донбас и Украина. Другари, борбените услови вклучуваат зголемен ризик“ – порача рускиот претседател.
„Свесен сум како се држите во оваа ситуација: исклучително храбри и професионални, стручни и бестрашни, компетентно и прецизно ги исполнувате најсложените задачи, а во исто време покажувате херојство“ истакна Путин.
„Целата наша земја со право се гордее со секој од вас. Сакам да ви се заблагодарам за вашата издржливост и беспрекорна служба за Русија, за вашата лојалност кон вашата татковина, за вашата заклетва на верност. Ви посакувам вам и на вашите семејства добро здравје, успех и среќа“ -додаде тој.