Протести низ Франција: Сообраќајот е во колапс, десетици луѓе се уапсени
Главната причина е падот на куповната моќ.
Во Франција, утрово започна граѓанската акција „Блокирај сè“, иницијатива создадена на социјалните мрежи, додека околу 75 лица веќе се приведени во пошироката област на Париз.
Оваа акција на блокирање патишта и избегнување на пазарување доаѓа во време на политичка криза во Франција, која чека нова влада по разрешувањето на центристичкиот премиер Франсоа Бајру и назначувањето на нов мандатар, поранешниот министер за одбрана Себастијан Лекорни.
Неколку акции и околу 75 апсења, според полицијата, се случија во пошироката област на Париз, по блокадите на патиштата и обидите за блокади на патиштата низ француската престолнина.
Околу 6.000 полицајци и жандарми беа мобилизирани во главниот град, каде што новинарите на АФП набљудуваа разни акции. Во зори, околу 100 млади активисти од автономното движење блокираа автобуска станица во северниот дел на Париз, пред полицијата да интервенира.
Во Париз, сообраќајот е „скоро нормален“ за метро и автобуски мрежи, иако има мали прекини на одредени меѓуградски железнички врски што минуваат низ Париз, како што е линијата што го опслужува Меѓународниот аеродром „Шарл де Гол“.
Првите акции беа пријавени и на западот од земјата, каде што демонстрантите палеа предмети на вијадукт во Нормандија.
Блокади беа најавени на кружни текови во Нант, на запад од Франција, како и во Тулуз на југозапад, каде што околу 200 демонстранти веќе блокираа прометен кружен пат користејќи гуми и разни огради и корпи за ѓубре.
Владата објави дека безбедносните сили ќе бидат распоредени во чувствителни области, ветувајќи „нулта толеранција“, со околу 80.000 жандарми и полицајци мобилизирани низ цела Франција.
Како што претходно објавија локалните медиуми, повици за блокада беа упатени и од неколку синдикати, особено во секторот за транспорт и медицински услуги, а беа најавени и други акции, од кои некои личат на поранешните акции на граѓанското движење „Жолти елеци“, со блокади на патиштата.
Главната причина е падот на куповната моќ, додаваат медиумите.