Протести во Украина откако Зеленски потпиша закон со кој се ограничуваат овластувањата на антикорупциската агенција

Стотици луѓе се придружија на протестите во Киев синоќа откако претседателот Володимир Зеленски потпиша нов закон усвоен од украинскиот парламент, кој се заканува да ја ограничи независноста на антикорупциските истражни тела.

-Во пракса, две институции – Националното биро за борба против корупцијата (НАБУ) и Специјализираното обвинителство за борба против корупцијата (САП) – стануваат подредени, изјави шефот на НАБУ, Семјон Кривонос, цитиран од локалните медиуми.

Кривонос го замоли Зеленски да не го потпишува законот, кој, според него, го загрозува патот на Украина кон членство во Европската унија. Сепак, претседателот го потпиша вечерта.

Неколку стотици луѓе, претежно млади луѓе, се собраа во протест пред претседателската канцеларија во Киев. Скандирајќи „Срам, срам“, тие го повикаа претседателот да стави вето на законот.

Протести се одржаа и во градовите Лавов, Одеса и Днепар.

Критичарите на Зеленски долго време го обвинуваат за сè поавторитарни тенденции.

Портпаролот на Европската комисија изјави во Брисел дека ЕУ е загрижена од овој потег. Тој рече дека НАБУ и САП се „клучни за реформската агенда на Украина“ и дека тие „мора да работат независно за борба против корупцијата“.

Комесарот за проширување на ЕУ, Марта Кос, нагласи дека владеењето на правото е во срцето на преговорите за пристапување во ЕУ.

Законот беше одобрен со мнозинство од 263 пратеници. Критичарите велат дека тоа му овозможува на Генералното обвинителство на Украина да ги прекине истрагите против високи државни функционери. Генералното обвинителство, исто така, има право да ги преземе истрагите од НАБУ и да ги предаде на други тела.

Протестите остануваат традиционална форма на јавен притисок во Украина, каде што претходните две револуции беа победнички за општеството.

-Корупцијата е проблем во секоја земја и секогаш мора да се бориме против неа, рече Игор Лаченков, блогер и активист кој ги повика луѓето да се приклучат на протестот преку неговите платформи на социјалните медиуми, кои достигнуваат повеќе од 1,5 милиони следбеници.

„Украина има многу помалку ресурси од Русија во оваа војна“, рече тој. „Ако ги злоупотребиме или, уште полошо, дозволиме да паднат во џебовите на крадците, нашите шанси за победа се намалени. Сите наши ресурси мора да одат во борбата“, рече тој.

Критичарите често ги обвинуваат агенциите за борба против корупцијата дека се западна алатка за влијание врз украинската политика.